TITUS
Tetraevangelium (redactio mcxetica defectiva)
Part No. 4
Previous part

Chapter: 4 
Verse: 1  Link to ntkpl   მაშინ იესო აღმოიყუანა უდაბნოდ სულისაგან გამოცდად ეშმაკისაგან.

Verse: 2  Link to ntkpl   
დაიმარხა ორმეოცი დღე და ორმეოცი ღამე, და მერმე შეემშია.

Verse: 3  Link to ntkpl   
მოუჴდა მას გამომცდელი იგი და ჰრქუა: უკუეთუ შენ ხარ ძე ღმრთისაჲ, თქუ, რაჲთა ქვანი ესე პურ იქმნნენ.

Verse: 4  Link to ntkpl   
ხოლო იესო მიუგო და ჰრქუა: წერილ არს, რამეთუ: არა პურითა ხოლო ცხონდების კაცი, არამედ ყოვლითა სიტყჳთა, რომელი გამოვალს პირისაგან ღმრთისაჲ.

Verse: 5  Link to ntkpl   
მაშინ წარიყვანა იგი ეშმაკმან მან წმიდა ქალაქსა და დაადგინა იგი სართულსა მას ზედა ტაძრისასა

Verse: 6  Link to ntkpl   
და ჰრქუა მას: უკუეთუ ძე ხარ ღმრთისაჲ, გარდაიგდე თავი შენი ამიერ ქუეყანად, რამეთუ წერილს არს, ვითარმედ: ანგელოზთა მისთა უბრძანებიეს შენთჳს, და ჴელთა მათთა ზედა აღგიპყრან შენ, ნუსადა წარსცე ქვასა ფერჴი შენი.

Verse: 7  Link to ntkpl   
ჰრქვა მას იესო: ვითარმედ წერილ არს: არა განსცადო უფალი ღმერთი შენი.

Verse: 8  Link to ntkpl   
კუალად წარიყუანა იგი ეშმაკმან მთასა ფრიად მაღალსა და უჩუენა მას ყოვვლნი სუფევანი სოფლისანი და დიდებაჲ მათი,

Verse: 9  Link to ntkpl   
და ჰრქუა მას: ესე ყოველი მიგცე შენ, უკეთუ დავარდე და თაყუანის-მცე მე.

Verse: 10  Link to ntkpl   
მაშინ ჰრქუა მას იესო: წარვედ ჩემგან მართლუკუნ, სატანა, რამეთუ წერილ არს: უფალსა ღმერთსა შენსა თაყუანის-სცე და მას მხოლოსა ჰმსახურებდე.

Verse: 11  Link to ntkpl   
მაშინ დაუტევა იგი ეშმაკმან მან, და ანგელოზნი მოვიდეს და ჰმსახურებდეს მას.

Verse: 12  Link to ntkpl   
ხოლო ესმა რა იესოს, ვითარმვდ იოანე მიეცა, განეშორა და წარვიდა გალილეად.

Verse: 13  Link to ntkpl   
და დაუტევა ნაზარეთი და მოვიდა და დაემკჳდრა კაპერნაუმს, საზღვართა ზაბულონისთა და ნეფთალემისთა,

Verse: 14  Link to ntkpl   
რაჲთა აღესრულოს თქმული იგი ესაიას წინაწარმეტყუელისა, რომელსა იტყჳს:

Verse: 15  Link to ntkpl   
ქუეყანა ზაბულონისი და ქუეყანა ნეფთალემისი, გზა ზღჳსა წიაღ იორდანესა, გალილეა წარმართთა.

Verse: 16  Link to ntkpl   
ერი რომელი სხდა ბნელსა, იხილა ნათელი დიდი. და რომელნი სხდეს საფლავსა და აჩრდილთა სიკუდილისათა, ნათელი აღმოუბრწყინდა მათ.

Verse: 17  Link to ntkpl   
მიერითგან იწყო იესო ქაღაგებად და სიტყუად: შეინანეთ, რამეთუ მოახლებულ არს სასუფეველი ცათა.

Verse: 18  Link to ntkpl   
და იქცეოდა რაჲ იესო ზღჳსკიდესა მას გალილეასასა, იხილნა ორნი ძმანი: სიმონ, რომელსა ეწოდა პვტრე, და ანდრია, ძმა მისი, ითხევლიდეს რაჲ სათხევლითა ზღუასა მას, რამეთუ იყვნეს მესათხევლე.

Verse: 19  Link to ntkpl   
და ჰრქუა მათ: მოვედით და შემომიდეგით მე, და გყვნე თქუენ მესათხევლე კაცთა.

Verse: 20  Link to ntkpl   
ხოლო მათ მეყსეულად დაუტევეს ბადე მათი და შეუდგეს მას.

Verse: 21  Link to ntkpl   
და წარმოვიდა მიერ და იხილნა სხუანი ორნი ძმანი: იაკობ ზებედესი და იოანე, ძმა მისი, ნავსა შინა ზებედეს თანა, მამისა მათისა. გან-რა-აგებდეს ბადეთა მათთა, და უწოდა მათ.

Verse: 22  Link to ntkpl   
ხოლო მათ მეყსეულად დაუტევეს ნავი იგი და მამა მათი და მისდევდეს მას.

Verse: 23  Link to ntkpl   
და მოვლიდა იესო ყოველსა გალილეასა და ასწავებდა შესაკრებელთა შორის მათთა და ქადაგებდა სახარებასა სასუფევლისასა და განჰკურნებდა ყოველსა სენსა და ყოველსა უძლურებასა ერსა შორის.

Verse: 24  Link to ntkpl   
და განითქუა ჰამბავი მისი ყოველსა ქუეყანასა ასურასტანისასა. და მოჰგურიდეს მას ყოველთა ბოროტად სნეულთა თითოსახეთაგან სენთა და გუემითა შეპყრობილთა და ეშმაკეულთა და ცისად-ცისად გუემულთა და განრღუეულთა, და განკურნნა იგინი.

Verse: 25  Link to ntkpl   
და მისდევდა მას ერი მრავალი გალილეათ და ათქალაქით და იერუსალიმით და ჰურისტანით და წიაღ იორდანით.

Next part



This text is part of the TITUS edition of Tetraevangelium (redactio mcxetica defectiva).

Copyright TITUS Project, Frankfurt a/M, 20.11.2023. No parts of this document may be republished in any form without prior permission by the copyright holder.